Integer vitae scelerisque purus

non eget Mauris iaculis neque arcu

nec venenatis gravida sagittis,

Fusce, pharetra,

sive per Syrtis iter aestuosas

sive facturus per inhospitalem

Caucasum vel quae loca fabulosus

lambit Hydaspes.

Namque me silva lupus in Sabina,

dum meam canto Lalagem et ultra

terminum curis vagor expeditis,

fugit inermem;

quale portentum neque militaris

Daunias latis alit aesculetis.

Nec Iubae tellus generat, leonum

arida nutrix.

Pone me pigris ubi nulla campis

arbor aestiva recreatur aura,

quod latus mundi nebulae malusque

Iuppiter urget;

pone sub curru nimium propinqui

solis in terra domibus negata:

dulce ridentem Lalagem amabo,

dulce loquentem.

Orazio

Ode 1, 22

https://www.versionitradotte.it/orazio/carmina-i-22-il-poeta-e-un-uomo-onesto/

https://youtu.be/xbPG5GUAgPg

https://youtu.be/5-RaoefhJhQ